Tag Archives: Internet

Bloga, idazle frustratuaren soluzioa

Txikitatik gustatu izan zait idaztea. Ikastolan nenbilenean gustura betetzen nituen etxeko lan horiek. Beno, idazteko gairen bat bururatzen zitzaidanean behintzat. Izan ere, pelutxeen izenak adibide, imajinazioa ez da espreski neure indarguneetako bat. Lagun bati entzuna diot guztiok garela sortzaileak, baina mugak jartzen dizkiogula geure buruari. Zeinek daki.

Sarri entzun izan dut blogak tresnak direla, helburuak lortzeko edo lortu bidean eragiteko erremintak. Badira euskarazko edukiak sortzeko (eta beraz interneten euskararen presentzia biderkatzeko), badira hainbat gai lantzeko eta masa kritikoa sortzeko, badira sareak eraikitzeko (kaixo bakalhautar eta blogsovietarrok), noizbehinka (ez oso sarri) badira sentimenduak eta minak plazaratu eta arintzeko, eta, beno, marketinerako ere badira blogak.

Horiez guztiez gain, neuretzako idazle izaera frustratuari irtenbidea topatzeko modua ere bada bloga. Papelean inork argitaratuko ez lituzkeen arinkeria eta sasi-sakonkeriak plazaratzeko modua. Hala ere, badaukat noizbehinka bloga eguneroko moduan erabiltzeko tentazioa, kandadurik gabeko eguneroko gisa. Inork irakurriko ez lituzkeen horiek, edo inork irakurtzea nahiko ez nukeen horiek, edo… gutxi batzuek irakurtzea nahiko nukeen mezu horiek idazteko. Aurrerago, zeinek daki.

Madrilgo Retiroan orain dela hilabete batzuk topatutakoa. Idazle frustratuen beste tresna bat, akaso

Madrilgo Retiroan orain dela hilabete batzuk topatutakoa. Idazle frustratuen beste tresna bat, akaso


#azoka47 eta @kabiadurango

Uste baino egun luzeagoa izan da gaurkoa, Durangon. Bazkaltzera etxera etortzeko asmotan joan, eta afaltzeko itzuli. Sendatuta eta pozik.

Izan ere, gaurkoa berezia izan da. Beñat, Unai eta Gorka lagunek (Talaios Kooperatiba sortu berriko kideak hirurak) jardunaldi interesgarriak antolatu dituzte gaurkorako Durangoko Azokako Kabian. Oreretatik Durangoraino iritsi da gaurkoan Kabia.

Goizeko planean lagun kuadrilatxoa elkartu gara (Asier Artsuaga eta Karlos Sukunza tartean), eta Durangoko Azokari gune berria sortu diogu: http://kabia.info/. Gunearen azalpena aurreraxeago jasoko omen dute txokoren baten. Era berean, David eta konpainiak hurrengo urterako sare egitura bat planteatu dute.

Arratsean, bestalde, Tabu 10 izenpean hitzaldi labur sorta bat izan dugu, Euskara hitza tabu izanda. Goizekoa baino jendetsuagoa, hori bai. Tartean etorri zaizkigu, besteak beste, Maite Goñi,  Iturri, Asier Miron, Lander Arbelaitz, Josi eta Olatz. Askotarikoak izan dira arratseko hitzaldiak (Blogsoviet proiektua tartean), guztiak ere erakusteko teknologiak jendartearen zerbitzura jartzean gauza interesgarriak eraiki daitezkeela (ikus Errenteriako Kabia eta Bakalhau, esate baterako). Hitzaldiotako baten Iturrik esandakoak bultzatu nau gaurkoan idaztera: blogak garabiak bezalakoak dira, unearen arabera, suntsitu edo eraikitzeko balio dezakete.

Amaiera bikaina eman diogu egunari gainera. Hedoi Etxarte lagunaren poesia liburuaren aurkezpenera hurbildu, eta txalo zaparrada eskaini diogu aurkezpen original zein ausartari. Zorte on proiektuaz, kamarada!

Kooperatiben webguneak eta domeinuak

Kooperatiben webguneetara edo kooperatiben mugimenduarekin lotutako guneetara jo duzue azken aldian? Hona hemen beraien webguneen adibide batzuk: www.goiena.net, www.mondragon.edu, www.arizmendi.eu, www.forokoop.coop, www.mik.es, http://talaios.net/, www.fagorederlan.es eta www.fagor.com.

Domeinuetan fijatzen bazarete, gutxi dira .coop duten guneak. Badirudi domeinuaren kostua bereziki altua dela, Beñat lagunak aipatu bezala. Nazioarteko Kooperatiba Aliantzaren (NKA edo ICA, International Cooperative Alliance) tarifen arabera, domeinuak urteko 120 dolarreko kostua luke. Interesgarria litzateke, horren harira, kooperatiben mugimenduak aintzat hartzea webguneek duten garrantzia eta beren izaera kooperatiboa azpimarratzea, eta dagokion erakundeari tarifen inguruan galdegitea. Izan ere, nazioartean eredu den euskal kooperatiben mugimenduak isla izan behar luke bai domeinuetan, baina baita kooperatibek erabiltzen duten izenetan ere. Egia esan, atzerritik Arrasatera etorritako batek baino gehiagok aipatu digu hemen “kooperatiba” hitza ez dela inon ikusten, kooperatibak nonahi egon arren. Lotsatzen al garen ere galdetu digute. Kuriosoa, ezta? Lortutakoaz (bere alde ilunekin) harro egonda ere, izandako arrakasta sozioekonomikoaren muina eredu kooperatiboa izan dela ez dugu erakusten ez kartel ezta domeinuetan ere.

Eta… domeinuen inguruko hausnarketa bultzatuko bagenu, izaera kooperatiboak duen garrantzia azpimarratuz? Apustu polita litzateke. Acicoop taldeak, adibidez, kooperatiba izateaz harro zaudela esateko eskaintza bat atera duela irakurri berri dut.

 

Mondragon Korporazioa Alemaniako komunikabide batean

Mondragon Korporazioko twitter kontuan jasotakotik abiatuta, Alemaniako komunikabide batek egindako Mondragon Korporazioari buruzko dokumental labur bat ikusteko aukera izan dut. Daturen bat edo beste guztiz zuzenak ez diren arren, interesgarria da kooperatibak bezalako eredu sozioekonomikoa duten enpresak hain leku onean uztea.

 


#kolosala -k Bilbo txiki utzi zueneko hura

Manifestazio ororen ondorengoak ezagunak dituzue. Egunkariak erosi (Euskaldunon Egunkaria eta Egin garai batean), eta argazkietan eta hitzetan gure esperantzak eta ilusioak islatuta ikusi. Baina azken aldian informazio uholdea probestu, eta hamaika komunikabidetan murgiltzen gara, interneteko argazkiak, estekak, artikuluak, bideoak… ikustera. Eta, atzoko kasuan bezala, txundituta eta irribarrez gelditzen gara sarri. Halakoa izan baitzen atzokoa, txundigarria eta pozgarria.

Gaurkoan, eta atzokoa egun historikoa izan zela buruan izanik, blogean irakurritako esteken bilduma egin nahi izan dut, irribarrez eta indarrez faltan gabiltzanean mezua zabaldu eta 110000 arrazoi izan ditzagun aurrera egiteko.

Hona hementxe bildumatxoa, iturri gutxi batzuekin. Zuek ere gehi ditzakezue, nahi izanez gero, topatutako altxorrak. Zuzeu-n ere ikusi dut bilduma bat, hemen.

Argazki/bideoak:

Artikuluak:

Azalak: