Orain dela hilabete batzuk BERRIAren aldeko Ziztada Jaialdia egin genuen Arrasaten. Bertan Tobera txiki bat, epaiketa bat, egin genuen.
Eduki librearen aldeko (baita euskarazko edukiaren alde) keinutxo bat egin nahian, lan-taldean egindako gidoia sarera igotzea erabaki genuen, “Creative Commons Aitortu Partekatu” lizentziapean.
Hemen duzue: Tobera Ziztada
Jarri dute urtarrilaren 19an Arrasaten Berriaren alde egin genuen jaialdiaren bideoa webgunean bertan. Hemen duzue, toberatxo bat tartean!
Kooperatibak eredu sozioekonomiko alternatibo gisa ulertzen ditut. Askok ulertzen ditugu horrela. Merkatu kapitalistan egonda ere, bestelako balio eta printzipioak dituzten erakunde gisa. Kapitala tresna gisa dutenak, helburu gisa baino. Izan ere, kooperatiben funtsa komunitatearen garapena da. Oinarrian hori da. Beste kontu bat da egungo kooperatiba batzuen oinarria zein den, zergatik sortzen diren kooperatibak, kooperatibako kide batzuen helburuak zeintzuk bihurtu diren, eta abar luze bat.
Hala ere, ez da nire asmoa kooperatiba batzuen norabidearen (edo noranzkoaren?) inguruko hausnarketa egitea, baizik eta azken aldian gero eta nabarmenago egiten zaidan interkooperazio eta elkartasunaren garrantzia aldarrikatzea.
MONDRAGON adibide gisa hartzen badugu, bere gorabehera guztiekin, esango nuke bere arrakastaren gakoetako bat sortutako interkooperazioa, sarea bera, dela. Izan ere, zailtasun zein erronka berrien garaian printzipio eta helburu berak (antzekoak akaso) dituzten norbanako zein erakundeen arteko kolaborazioa gakoa bihurtzen da. Iraultzarako bezala, antolaketa eta sareak ezinbestekoak dira proiektu komunitario, lokal baina global, baterako. Krisi garaiko kudeaketa aztertzen ari naiz nire tesian, eta hori berori ikusi dut garbien: interkooperazioa eta kooperatiben arteko elkartasuna eta konpromisoa finkatuta eta egituratuta egotea zein garrantzitsua den. Kooperatibak alternatiba erreala izan daitezen zeinen garrantzitsua den kooperazioa.
Horren harira, eta Gipuzkoko beste txoko baten, Talaios Kooperatibako lagunek (Beñat Irasuegi, Unai Gorrotxategi eta Gorka Juliok) Olatukoop egitasmo interesgarria jarri dute martxan. Nolabait, orain dela 50-60 urte Debagoienean sortutako interkooperazioa eta elkartasunaren olatua egungo mugimendu kooperatiboan sortu nahi dute, eta horretarako oinarriak definitu dituzte. Etorkizun oparoa duena, egungo egoeran gero eta garrantzitsuagoa baita irla kooperatiboen sarea sortu eta indartzea.
Pasa den astean, Manchester-en nazioarteko konferentzia batean parte hartzeko aukera izan nuen. Aukera aparta izan zen kooperatiben eta ekonomia sozialaren munduan lanean ari diren ikertzaileak ezagutzeko, eta esperientziak elkartrukatzeko. Proiektu interesgarriak planteatu genituen, eta etorkizunerako kontaktu interesgarriak egin.
Mezu honetan topatuko duzue aurkeztutako ponentzia, bertaratutakoen artean zenbait galdera eta interesa zabaldu zituena.
Twitter-en egin ditugu txio batzuk, eta jakingo zenuten azken egunotan Donostian eta Oñatin izan garela, kooperatiben eta ekonomia sozialaren inguruko topaketetan. Aurtengoan, Deustuko Unibertsitatea eta Euskal Herriko Unibertsitatearekin batera, Mondragon Unibertsitateak (MIK Ikerketa Zentroa tartean) antolatu ditu CIRIECen XIV. topaketak.
Interesgarriak izan dira topaketak, hainbat gairen inguruan aritu ginen. Eztabaida, mahai inguru, irekiera eta itxiera ekitaldietan kooperatibak alternatiba gisa aurketu dira. Alternatiba gisa, krisi multidimensionalari aurre egiteko. Blog honetan behin baino gehiagotan aipatu bezala, krisiaren aurrean kooperatibek erresistentziarako hainbat tresna dituztela. Hala ere, eredu horretan sakondu behar dugu, kontuan izanik paradigma ekonomikoaren aldaketa datorrela dirudiela, enpresen eskalak eztabaidagai izaten ari direla, produkzio eredu berriak planteatzen ari direla…
Testuinguru honetan, iruditzen zait nire tesian aztertzen dudan interkooperazioa aspektu gakoa dela kooperatiben biziraupen eta transformazioan. Aurreraxeago txertatu dudan power pointean ikusiko duzue Arrasateko Kooperatiben Esperientzian garatutako tresna gakoetako bat, Lagun-Aro, eta tresnaren aplikazioak ekarritako ondorioak. Artikulua ere txertatuko dut, publikatzen denean…
Bestalde, audio interesgarri bat duzue jarraian, Euskadi Irratian Lanki-ko ikertzaile den Iñigo Iñurrategi eta Fagorreko Lehendakari den Joxean Alustizarekin. Bertan kooperatibek eskaintzen dituzten aukerak dituzte mintzagai. Minutu batzuk hartzea gomendatzen dizuet.
